Իմ վերլուծության համաձայն՝ ընդդիմադիր ուժերի՝ «Ուժեղ Հայաստան», ԲՀԿ-ի և «Հայաստան» դաշինքի համատեղ վարկանիշը ներկայիս հանրային կարծիքի ֆոնին մոտ է 50 տոկոսին։ Սա նշանակում է, որ իշխանության ներկայացուցիչները, որոնք ունեն իրենց աջակցողների շրջանակը, և ընդդիմադիր ուժերը, որոնք ունեն իրենց աջակցողների շրջանակը, գտնվում են գրեթե հավասարակշռության մեջ։
Այս իրավիճակում ակտիվ պայքարողների թիվը դեռ բավարար չէ փոփոխությունների համար։ Ընդհանուր հանրային ֆոնը, որտեղ առկա են «քաղաքականությամբ չզբաղվող», չկողմնորոշված, «շառից փորձանքից հեռու» մնացող և իրենց մասնակցությունը չտեսնող շերտեր, իշխանությանը թույլ չի տալիս զգալ իր դիրքերի ամրապնդումը։ Փոխարենը, ընդդիմադիր ուժերը, չնայած ունենալով ավելի մեծ աջակցություն, դեռ չեն կարողացել հավաքագրել բավարար քանակի ակտիվ քաղաքացիներ՝ իրադարձությունների ընթացքը փոխելու համար։
Այսպիսով, ընդդիմադիր ուժերի առաջնային խնդիրը պետք է լինի ընտրողի հետ անկեղծ և դինամիկ աշխատանքի իրականացումը։ Պետք է հասկանալ, որ ակտիվ հանրային շերտերը, անկախ իրենց քաղաքական նախասիրություններից, պետք է իրենց հերթին աշխատեն իրենց մտերիմ ապաքաղաքական շրջանակների հետ։ Կարևոր է մարդկանց բացատրել, որ սա իրադարձությունների վրա իրենց ազդեցություն ցուցաբերելու վերջին և ամենակարևոր հնարավորությունն է։
Այս հորդորը մենք արել ենք 2020 թվականին՝ մինչև պատերազմը, 2021 թվականի ընտրություններին ընդառաջ, 2022 թվականի աշնանը՝ երբ իշխանությունը միանձնյա ստորագրեց Արցախի ճանաչման մասին հայտարարությունը, և շրջափակման ամբողջ ընթացքում։ Ցավոք, մեր հասարակությունը սովորել է իրադարձությունները արձանագրելու՝ ոչ թե դրանց նախազգուշացնելու, ոչ թե դրանցից խուսափելու, այլ դրանք տեղի ունենալուց հետո։
Հետևաբար, հանրային բոլոր շրջանակների հետ ակտիվ աշխատանքի ամենապատասխանատու փուլը պետք է համարել բացված։ Մեր բոլորի խնդիրն է՝ ներգրավել բավարար քանակի ակտիվ քաղաքացիներ, որոնք կդառնան փոփոխությունների գործոնը։
