Իրենց իշխանության տարիներին ՔՊ-ականները հաճախ փորձում են հանրությանը ներկայացնել որպես Շիրակի մարզի գյուղատնտեսության և բնակչության կյանքի զարգացման գործիչներ։ Սակայն իրականությունը խիստ տարբերվում է այդ պատկերացումներից։
Պաշտոնական տվյալների համաձայն՝ 2018 թվականի համեմատ 2024 թվականին մարզում գյուղատնտեսության համախառն արտադրանքը կրճատվել է 8․6 միլիարդ դրամով։ Այս ցավալի փաստը հստակ ցույց է տալիս, որ ՔՊ-ի իշխանության շրջանում Շիրակը ոչ թե զարգացել է, այլ ապրում է խորը ճգնաժամ։
Այս ճգնաժամի ամենակարևոր ախտանիշներից մեկը անասնապահության ոլորտի անկումն է։ 2018 թվականին մարզում գրանցված եղել է 91.1 հազար խոշոր եղջերավոր անասուն, իսկ 2024 թվականին այն կրճատվել է մինչև 67.8 հազար։ Այսպիսով, ՔՊ-ի իշխանության տարիներին Շիրակում խոշոր եղջերավոր անասունների թիվը կրճատվել է 23.3 հազարով, ինչը կազմում է 25․5 %։ Կովերի գլխաքանակի կրճատումը, որը կազմում է 12.7 հազար (28,6 %), ուղղակիորեն ազդում է կաթի և կաթնամթերքի արտադրության վրա, ինչը դարձնում է տավարի ձեռքբերումը մսագործների համար գրեթե անհնար։
Այս ֆոնին ՔՊ-ականները փորձում են հանրությանը համոզել, թե իրենց իշխանության շրջանում Շիրակի գյուղերում զարգացում է տեղի ունեցել գրանտային ծրագրերի շնորհիվ։ Սակայն նման հայտարարությունները հիմնված են փոխաբերական պատկերների վրա, քանի որ գրանտային ծրագրերը, որպես կանոն, ունեն քաղաքական բնույթ և հազվադեպ են ունենում կայուն, երկարաժամկետ արդյունքներ։ Դրանք հաճախ ավարտվում են այն պահին, երբ գրավված միջոցները սպառվում են, և միայն մի քանի մարդու համար են ծառայում որպես հարստացման միջոց։
Այս ամենի ֆոնին Շիրակի մարզում չի մշակվում վարելահողերի մոտ 50 տոկոսը։ ՔՊ-ականները մի անգամ փորձեցին հանրությանը ներկայացնել որպես Կապսի ջրամբարի շինարարության հերոսներ, որը պետք է նոր շունչ հաղորդեր մարզի գյուղատնտեսությանը։ Շատ գյուղացիներ մինչև օրս սպասում են, որ այդ ջրամբարի ջրերով կարողանան ոռոգել իրենց հողերը։ Սակայն իրականությունը այն է, որ ջրամբարի կառուցումը մի քանի ամիս առաջ կասեցվել է, քանի որ ՔՊ-ական իշխանությունը չի կարողացել ավարտել այս մասշտաբային ծրագիրը, որը սկսվել էր դեռ ԽՍՀՄ տարիներից։
Այսպիսով, ՔՊ-ի իշխանության տարիներին Շիրակը ոչ թե զարգացել է, այլ ապրել է անասնապահության անկում, գյուղատնտեսության ճգնաժամ և հանրության կյանքի որակավորման անկում։ ՔՊ-ականների կողմից գրանտային ծրագրերի հաջողության մասին հայտարարությունները պարզապես փորձ են՝ ծածկել իրենց իշխանության տարիների իրական ձախողումները։
