Իրանի հետ պատերազմի սկզբնական շաբաթներին Իսրայելի արտաքին հետախուզության գործակալության՝ «Մոսադի» ղեկավարը Նեթանյահուին ներկայացրել էր Իրանում իշխանափոխության ծրագիր։ Այս մասին հաղորդում է ամերիկյան պարբերականը՝ նշելով, որ ծրագիրը լիովին ձախողվել է։
Համաձայն հրապարակման՝ Իրանի հետ պատերազմի շեմին «Մոսադի» ղեկավար Դեյվիդ Բարնեան համոզել էր Նեթանյահուն, որ ռազմական գործողությունների սկսվելուց հետո իր գործակալությունը կարող է արթնացնել իրանական ընդդիմությունը՝ հրահրելով անկարգություններ, որոնք կհանգեցնեն Թեհրանի կառավարության տապալմանը։ Նույն հայեցակարգը Բարնեան ներկայացրել էր նաև Թրամփի վարչակազմի բարձրաստիճան պաշտոնյաներին։
Նեթանյահուն ընդունել էր այդ ծրագիրը՝ հույս ունենալով, որ եթե պատերազմի սկզբում վերացնեն Իրանի առաջնորդներին, ապա իրականացնեն ռեժիմի փոփոխությանն ուղղված գաղտնի գործողություններ, ինչը կհանգեցնի զանգվածային ապստամբության։ Սակայն, ինչպես պարզվեց, երեք շաբաթ անց ոչ մի ապստամբություն տեղի չունեցավ։
Ամերիկյան և իսրայելական հետախուզական գործակալությունները միաձայն եզրակացրին, որ Իրանի թեոկրատական ղեկավարությունը թուլացած է, բայց մնում է անփոփոխ։ Զինվորականների և ոստիկանության նկատմամբ տարածված վախը մարել է ինչպես ներքին ապստամբության, այնպես էլ՝ սահմանների երկայնքով էթնիկ զինյալների հարձակումների հույսերը։
Այս հանգամանքը ցույց է տվել, որ Իսրայելի և Միացյալ Նահանգների վստահությունը՝ կարողանալ վառել լայնածավալ ապստամբության կայծը, սխալ էր։ Իրանի կառավարությունը փլուզվելու փոխարեն ամրացել է և միայն սրել է լարվածությունը՝ պատասխան հարվածներ հասցնելով Պարսից ծոցի ռազմական բազաներին, քաղաքներին և նավթագազային օբյեկտներին։
Ըստ պարբերականի՝ ԱՄՆ-ում այլևս չկա փորձագետ, որը հավատա Թրամփի հաջողությանն Իրանում՝ առանց ցամաքային գործողությունների։ Սակայն նույնիսկ այդ տարբերակում փորձագետները համոզմունք են հայտնում, որ ԱՄՆ-ն կմխրճվի նոր «Վիետնամի» մեջ, որի արդյունքում նավթի գները կհասնեն 150 դոլարի, իսկ աշխարհի տնտեսությունը կկանգնի։
Իսրայելի վարչապետը, գիտակցելով իր քաղաքական պարտությունը, փորձում է ամեն ինչ անել, որ պատերազմը չդադարի։ Նա վերջերս իր մամուլի ասուլիսում հայտարարել է․ «Հեղափոխությունները օդից չեն իրականացվում»։
Ամերիկյան պարբերականը նշում է, որ նույնիսկ Նեթանյահուն սկսել է կասկածել Իրանում իշխանափոխության հնարավորությանը և հույսը դրել է հրաշքի վրա։ Փակ դռների հետևում վարչապետը տեղի է տալիս իր հիասթափությանը՝ ճանաչելով, որ «Մոսադի» ծրագրերը չեն իրականացել։
